ஆனந்தவேதம்

உனக்காக,உன் வாழ்க்கைக்காக,உன் ஆனந்தத்திற்காக...

திருவனந்தபுரம் ஸ்ரீ ஸ்ரீ ஸ்ரீ அனந்தபத்மநாப ஸ்வாமி

திருவனந்தபுரம் ஸ்ரீ ஸ்ரீ ஸ்ரீ அனந்தபத்மநாப ஸ்வாமி
அனந்தபுர நகரம் புகுதுமின்றே !

Search This Blog

Thursday, September 7, 2017

வரும்...போகும்...

காரணம் எதுவாயினும்
தற்கொலை தவறே !

தற்கொலை
தியாகமல்ல !

தற்கொலை
தீர்வல்ல !

தற்கொலை
அறிவு சார்ந்ததல்ல !

தற்கொலை
நியாயமல்ல !

யார் செய்தாலும்,
தற்கொலை ஒரு
முட்டாள்தனமே !

எதற்காக தற்கொலை
செய்துகொண்டாலும்,
அது பைத்தியக்காரத்தனமே !

படிக்காதவர் செய்தாலும்,
படித்தவர் செய்தாலும்,
தற்கொலை அசிங்கமே !

படிப்பிற்காகத் தூக்கிட்டு உயிரை விட்டாலும்...
இனத்திற்காக தீக்குளித்து உயிரை விட்டாலும்...
மொழிக்காக
விஷமறிந்து உயிரை விட்டாலும்,
அவமானத்திற்காக கீழே குதித்து உயிரை விட்டாலும்,
காதலுக்காக ஜோடியாய் கடலில் வீழ்ந்தாலும்,
பரீட்சையில் தோல்விக்காக கழுத்தில் சுருக்கிட்டுக் கொண்டாலும்...
தற்கொலை மிகக்கேவலமான செயலே...
கொடுமையான மனோவியாதியே !

இதைவிடக் கொடுமை...

தற்கொலை செய்து கொண்டவரை தியாகியாய் பேசுவதே !
அவர்களை எதிர்கால
சந்ததிக்கான விதையாய் கொண்டாடுவதே !

இங்கே தற்கொலைகள் செய்துகொள்பவர்களை கொண்டாடுவதே பிழைப்பாயிற்றே !!!
என்ன பயங்கரம் இது !!!

நல்லவேளை இன்னும்
இணைய விளையாட்டில் தற்கொலை செய்பவரை வீரராய்
கொண்டாடாதவரை நாம் பாக்கியம் செய்தோம் !!!

அழகான வாழ்க்கைக்கு ஆயிரம் அர்த்தங்கள் !
அந்த வாழ்க்கையில் வாழ
கோடி விஷயங்கள் உண்டு !

ஒரு சில தோல்விகள்...
ஒரு சில ஏமாற்றங்கள்...
ஒரு சில நஷ்டங்கள்...
ஒரு சில அவமானங்கள்...
இவையெல்லாம் வாழ்வில் வரும்...போகும்...

உயிரைவிட உலகில் இவை பெரியதோ ?!?

மெத்தப் படித்த சமுதாயம் என்று
நினைப்பவரெல்லாம்,
தற்கொலையை நியாயப்படுத்துவதே
அபத்தம்...விபரீதம்...

கல்லால் அடித்து விரட்டப்பட்ட நிலையிலும்,
சொறி பிடித்த தெரு நாய்
தற்கொலைக்கு முயலவில்லை !!!

மரங்களை எல்லாம் வெட்டி காட்டை பலைவனமாய் மாற்றிய பின்னும், பறவைகள் தற்கொலையை நினைக்கவில்லை !!!

காட்டிலிருந்து தன் இனத்திடமிருந்து பிரித்து கூண்டில் அடைத்தபோதும், மிருகங்கள் தற்கொலைக்கு யோசிக்கவில்லை !!!

தன்னை அழிக்க உலகமே ஓயாமல் முயற்சி செய்துகொண்டிருந்தாலும், கொசுக்கள் கூட தற்கொலைக்கு ஆசைப்படவில்லை !!!

பெற்ற பிள்ளைகளே முதியோர் இல்லத்தில் வீசிவிட்ட பிறகும், வயதானவர்கள் தற்கொலைக்கு சிந்திக்கவில்லை !

கைகால் இல்லாதவர்,
கண்ணில்லாதவர்,
விபத்தில் கழுத்திற்கு கீழே உணர்ச்சி இழந்தோர்...
இப்படிப் பலரும் ஏதோ ஒரு நற்செயலை செய்து இங்கே மற்றவருக்காய் வாழ்கின்றனர்...

ஆனால் படித்த முட்டாள்கள் சிலரே தற்கொலை செய்து கொண்டு, வாழ்வை அபத்தமாக்குகின்றனர்...

தற்கொலை செய்துகொள்பவர், தீவிரவாதியை விட பயங்கரமானவர்கள்...

ஹே மானிடா !
தற்கொலை செய்பவரின் முகத்தில் காரி உமிழக் கற்றுக்கொள் !!!
தற்கொலை செய்தவரை அருவருப்பாய் பார்க்க பழகிக்கொள் !!!

அப்போதுதான் நாளைய சமுதாயம் உருப்படும் !!!

Read more...

Monday, August 21, 2017

கண்ணா ! தூது செல் !

ராதே...
வருவாயா...
உன் தாசி
கெஞ்சுகிறேன் !

ராதே...
தருவாயா...
உன் தாசி
காத்திருக்கிறேன் !

ராதே...
அருள்வாயா...
உன் தாசி
யாசிக்கிறேன் !

ராதே...
உன் தாசியின்
இதயத்தை
உனக்குப் பிடித்த
நிதிவனமாய்
மாற்றிவிடு !

ராதே...
உன் தாசியின்
மனதை
நீயும் கண்ணனும்
விளையாடும்
மெத்தையாய்
மாற்றிவிடு !

ராதே...
உனக்கும்,
உன் கண்ணனுக்கும்,
அந்தரங்க
கைங்கரியம்
செய்ய உன் தாசிக்கு
வாய்ப்பு கொடு !

ராதே...
தகுதியில்லாத
உன் தாசியை
உன் திருவடியில்
என்றுமே
வைத்துக்கொள் !

க்ருஷ்ணா !
உன்னிடம்
கெஞ்சுகிறேன் !
எனக்காக
ராதிகாவிடம்
தூது செல் !

என் மனதை
உன் ராணியிடம்
சொல் !

என் தேவையை
உன் அழகியிடம்
சொல் !

என் தாபத்தை
உன் செல்லத்திடம்
சொல் !

என் அவசரத்தை
உன் தேவதையிடம்
சொல் !

காத்திருக்கிறேன்
கண்ணா !
உன் காதலியின்
ஒரு வார்த்தைக்காய் !

Read more...

Sunday, August 20, 2017

யாரோ...இந்த பிள்ளை...

முச்சந்தி என்றால்
இந்த பிள்ளையுண்டு !

அரச மரம் என்றால்
இந்த பிள்ளையுண்டு !

ஆத்தங்கரை என்றால்
இந்த பிள்ளையுண்டு !

குளத்தங்கரை என்றால்
இந்த பிள்ளையுண்டு !

மஞ்சள் பொடி என்றால்
இந்த பிள்ளையுண்டு !

களிமண் என்றால்
இந்த பிள்ளையுண்டு !

கண் திருஷ்டி என்றால்
இந்த பிள்ளையுண்டு !

கருப்பு எரும்பு என்றால்
இந்த பிள்ளையுண்டு !

கன்னி மூலை என்றால்
இந்த பிள்ளையுண்டு !

அருகம்புல் என்றால்
இந்த பிள்ளைக்குண்டு !

எருக்கம்பூ என்றால்
இந்த பிள்ளைக்குண்டு !

தேங்காய் என்றால்
இந்த பிள்ளைக்குண்டு !

மாம்பழம் என்றால்
இந்த பிள்ளைக்குண்டு !

கொழுக்கட்டை என்றால்
இந்த பிள்ளைக்குண்டு !

சுண்டல் என்றால்
இந்த பிள்ளைக்குண்டு !

அப்பம் என்றால்
இந்த பிள்ளைக்குண்டு !

கரும்பு என்றால்
இந்த பிள்ளைக்குண்டு !

மஹாபாரதம் என்றால்
இந்த பிள்ளையுண்டு !

யானை என்றால்
இந்த பிள்ளையுண்டு !

சதுர்த்தி என்றால்
இந்த பிள்ளையுண்டு !

குடை என்றால்
இந்த பிள்ளைக்குண்டு !

மூஞ்சூறு என்றால்
இந்த பிள்ளையுண்டு !

பசுஞ்சாணம் என்றால்
இந்த பிள்ளையுண்டு !

வெள்ளெருக்கு என்றால்
இந்த பிள்ளையுண்டு !

சுழி என்றால்
இந்த பிள்ளையுண்டு !

யாரோ !?!
இந்த பிள்ளை
யாரோ !?!

இவரே பிள்ளையாரோ !!!

சங்கடங்கள் நீக்க
சதுர்த்தியில்
வந்த பிள்ளையே !!!

சிவனையும் எதிர்த்து,
தாய் சொல்லைக் காக்க
வந்த பிள்ளையே !!!

அம்மையப்பனே உலகம்
என எல்லோருக்கும் சொல்ல
வந்த பிள்ளையே !

எல்லோருக்கும் பிள்ளையே !!!
சமத்துப்பிள்ளையே !!!
கொழுக்கு மொழுக்கு பிள்ளையே !!!
கொழுக்கட்டை பிள்ளையே !!!

ஊரும் உலகமும்
கொண்டாடும் பிள்ளையே !!!

தொந்திப்பிள்ளையே !!!
தந்தப்பிள்ளையே !
பிள்ளைகள் கொண்டாடும்
பிள்ளையே !!!

வா !
வா !
உனக்காகவே
நாங்கள்
ஆசை ஆசையாய்
காத்திருக்கிறோம் !

அப்பம், பழம், கரும்பு...
கூடவே எங்கள் அன்பும்...
உனக்காகவே....

Read more...

Saturday, August 19, 2017

வாழு ! வாழு ! வாழு !

ஹே மனிதா !!!!

கொஞ்சம் உலகை
ஒழுங்காய் பார் !
நீ பெரியோன்
என்பதை மறந்து,
சீடனாய் உலகைப் பார் !

இருப்பிடத்தை விட்டு,
இடம் பெயர்த்தாலும்,
புதிய இடத்தில்,
இயலாமையால்
புலம்பாமல்,
உறுதியாய் வாழும்
செடிகளைப் பார் !

கடல் கடந்து,
ஒவ்வொரு வருடமும்,
இடம் பெயர்ந்து,
ஆகாயமார்க்கமாய்
பல நாடுகளுக்குச்
சென்று அங்கு வாழ்ந்து,
மீண்டும் தன் குஞ்சுகளோடு,
தன் பழைய இடம் வரும்
பறவைகளைப் பார் !

தாயிடமிருந்து பிரிந்து,
மண்ணில் புதைத்த,
முட்டைகளிலிருந்து,
முட்டி மோதி வெளிவந்து,
கடற்கரை மணலிலிருந்து,
வெளிவந்து கடலுக்கு,
பயப்படாமல் செல்லும்,
ஆமைக்குஞ்சுகளைப் பார் !

ஆழத்தில் மனிதர்
புதைத்த பிறகும் கூட,
தானே மண்ணைக் கிளறி,
தானே உயர்ந்து,
தானே நிமிர்ந்து,
முளை விடும் விதைகளைப் பார் !

பறவைகளின் எச்சங்களில்,
இருந்து வெளிவந்து,
எங்கோ கட்டடத்தின்
மூலையில் விழுந்து,
ஒரு நாள் மழைத்துளியில்,
ஒய்யாரமாய் வளரும்,
சின்னஞ்சிறிய செடிகளைப் பார் !

புயல் காற்றில்,
சரிந்த பின்னும், மனிதர்
மறந்து போன பின்னும்,
புதிய எழுச்சியோடு,
மீண்டும் வான் நோக்கி,
வளரும் மரங்களின்
கிளைகளைப் பார் !

தழுவிக்கொள்ள,
மேலேற்றிவிட ஒரு
கொம்பு இல்லாத போதும்,
மேலே படர எல்லா
வழிகளிலும் ஆசையாய்
முயற்சிக்கும்,
உடலில் பலமில்லா,
ஊக்கத்தில் குறையில்லா,
கொடிகளைப் பார் !

மனிதர்கள் ஆசையாய்,
நடந்து, கையால் கிள்ளி,
கத்தரிக்கோலால்
வெட்டிய பின்னும்,
மீண்டும், மீண்டும்
முயற்சியோடு
துளிர்க்கும் புல்லைப் பார் !

இப்படி இருந்தால்
எனக்குப் பிடிக்கும்,
என்று மனிதர் தன இஷ்டப்படியெல்லாம்,
வெட்டி, வளைத்தாலும்,
புதியதாய் ஒவ்வொரு
நாளும் வாழும்,
க்ரோட்டன் செடிகளைப் பார் !

செடியிலிருந்துப் பறித்து,
பலர் கை மாறி,
நாரில் தொடுத்த பிறகும்,
வாடும் வரை,
ஆனந்தமாய் வாசம்
வீசும் மல்லிகையைப் பார் !

கண்ட இடங்களில்,
கொண்டவர் போட்டுச்
சென்றாலும், கண்டதை
மிதித்தாலும்,
காலுக்கு நன்மை
செய்யும் செருப்பைப் பார் !

யாருமே கவனிக்கவில்லை
என்றாலும், தினமும்,
துடைத்து அழகாய்,
வைக்கா விட்டாலும்,
தன் கடமையை
இருந்த இடத்தில்
இருந்து செய்யும்,
கடிகாரங்களைப் பார் !

உன்னோடு கூடவே,
நீயே கொண்டாடும்,
நீயே அதிசயிக்கும்,
நீயே தூக்கி எறியப்போகும்,
தினமும் தன்
கடமையிலிருந்து தவறா,
உன் கைப்பேசியைப் பார் !

இன்னும் ஓராயிரம்...
இல்லையில்லை...
இன்னும் பலகோடி...

உன்னைச் சுற்றி...
வாழு...வாழு...வாழு...
நிம்மதியாய் வாழு...
புலம்பாமல் வாழு...
ஆனந்தமாய் வாழு...
அழகாய் வாழு...
முயற்சியோடு வாழு...
புதியதாய் வாழு...
உற்சாகமாய் வாழு...
உனக்காக வாழு...
உறுதியாய் வாழு...
என்று கூவிக்கொண்டே
இருக்கும் இந்தக்
கடவுளின் தூதுவர்களைக்
கண் திறந்து பார் !!!

கடவுளின் தரிசனம் புரியும் !
கடவுளின் கோட்பாடு புரியும் !
கடவுளின் ஆசிர்வாதம் புரியும் !

Read more...

Monday, August 7, 2017

க்ரஹண புண்ணிய காலம் !

மதமாற்றம் என்ற
அசிங்கம் அழியட்டும் !
தன் மதம் என்னும்
புண்ணியம் சேரட்டும் !

தீவிரவாதம் என்னும்
கெடுதல் அழியட்டும் !
ஒற்றுமை என்னும்
புண்ணியம் சேரட்டும் !

வியாதிகள் என்னும்
கெடுதல்கள் அழியட்டும் !
ஆரோக்கியம் என்னும்
புண்ணியம் சேரட்டும் !

முதியோர் கஷ்டங்கள்
என்னும் அவலங்கள் அழியட்டும் !
முதியோர் நிம்மதி என்னும்
புண்ணியம் சேரட்டும் !

விவாகரத்து என்னும்
முட்டாள்தனங்கள் அழியட்டும் !
விவாகத்தின் மகத்துவம் என்னும்
புண்ணியம் பெருகட்டும் !

பிளாஸ்டிக் என்னும்
அசுரன் அழியட்டும் !
விவசாயம் என்னும்
புண்ணியம் பெருகட்டும் !

வறட்சி என்னும்
கொடுமை அழியட்டும் !
மழை என்னும்
புண்ணியம் பெருகட்டும் !

வறுமை என்னும்
பாபம் அழியட்டும் !
வளமை என்னும்
புண்ணியம் பெருகட்டும் !

கோபம் என்னும்
கொடுமை அழியட்டும் !
குணம் என்னும்
புண்ணியம் பெருகட்டும் !

லஞ்சம் என்னும்
வயிற்றெரிச்சல் அழியட்டும் !
நேர்மை என்னும்
புண்ணியம் பெருகட்டும் !

குப்பை என்னும்
அதர்மம் அழியட்டும் !
சுத்தம் என்னும்
புண்ணியம் பெருகட்டும் !

பகைமை என்னும்
பகட்டு அழியட்டும் !
பக்தி என்னும்
புண்ணியம் பெருகட்டும் !

வம்பு என்னும்
கொடுமை அழியட்டும் !
நாமஜபம் என்னும்
புண்ணியம் பெருகட்டும் !

கெட்ட வார்த்தைகள்
என்னும் கேடு அழியட்டும் !
அர்ச்சனை என்னும்
புண்ணியம் பெருகட்டும் !

பெண்ணுடல் மோகம்
என்னும் பேய் அழியட்டும் !
பெண்ணுடல் தெய்வீகம்
என்னும் புண்ணியம் பெருகட்டும் !

வாருங்கள் !
பிரார்த்திப்போம் !
நிச்சயமாக நடக்கும் !
நல்லதே நடக்கும் !
நல்லதே பெருகும் !
நல்லதே வாழும் !

இந்த சூடாமணி
சந்திர க்ரஹண
புண்ணிய காலத்தில்
நாம் பிரார்த்திப்போம் !

கண்ணன் அருள்கிறான் !
முழுவதுமாக வாங்கிக்கொள்வோம் !

©குருஜீ கோபாலவல்லிதாசர்

✍🏼🌱 *ஆனந்தவேதம்*🍃🖋

Read more...

Sunday, August 6, 2017

தோழா ! தோழி !

என்னை அறிந்த தோழன்/தோழி...

நானே என்னை
மறந்தாலும்,
என்னை மறக்காத
தோழன்/தோழி...

என்னை எல்லோரும்
வெறுத்து ஒதுக்கினாலும்,
என்னை விட்டு
நீங்காத தோழன்/தோழி !

என்னால் ஒரு
பலனும் இல்லை
என்றாலும் என்னை
வெறுக்காத தோழன்/தோழி !

என்னுடைய தேவைகளை
சொல்லாமலே
அறிந்த தோழன்/தோழி !

என் மீது கொண்ட
அன்பை எக்காலத்திலும்
விடாத தோழன்/தோழி !

என் மீது பூரணமான
நம்பிக்கை வைத்த
உண்மையான தோழன்/தோழி !

என்னை உள்ளபடி
அறிந்தும், புரிந்தும்,
என்னோடு வாழும்
அன்பான தோழன்/தோழி !

என் குற்றங்களை
சரிசெய்யும், என்
தவறுகளை சுட்டிக்காட்டும்
தைரியமான தோழன்/தோழி !

என்னை எனக்கே
பிடிக்கவில்லை
என்றாலும், என்னை
ரசிக்கும் தோழன்/தோழி !

இப்படி ஒரு தோழன்/தோழி....
உனக்கும் உண்டே...

அதான் நம் கண்ணன்/கண்ணம்மா...

Read more...

Saturday, August 5, 2017

ஆளவந்தீரோ !!!

எம்மை ஆளவந்தீரோ !!!

ஆண்டாளின் ஆடியில்,
அவதரித்து எம்மை
ஆளவந்தீரோ !

உத்திராட நக்ஷத்திரத்தில்,
உலகம் முழுவதும்
ஆளவந்தீரோ !

காட்டுமன்னார்கோயிலில்
வந்து பகவானைக் காட்டி
ஆளவந்தீரோ !

நாதமுனிகளின்
பக்த சாம்ராஜ்ஜியத்தை
ஆளவந்தீரோ !

ஆக்கியாழ்வானின்
அட்டகாசத்தை அடக்கி,
ஆளவந்தீரோ !

ராணியின் பதிவிரதா
மஹிமையை நிரூபித்து
ஆளவந்தீரோ !

தூதுவளைக் கீரைக்கு
ஆட்பட்டு மணக்கால் நம்பியால்
ஆள வந்தீரோ !

பகவத்கீதையைக் கேட்டு உருகி,
அழகன் அரங்கன்
ஆள வந்தீரோ !

அரங்கனின் காதலில்,
அரங்கநாயகியின் அன்பில்,
காவியை ஆள வந்தீரோ !

நடமினோ அனந்தபுரம் என்ற
அரையரின் வார்த்தைக்கு,
அனந்தபத்மநாபனை ஆளவந்தீரோ !

ஆம் முதல்வன் இவன்
என்று எங்கள் யதிராஜனை
ஆளவந்தீரோ !

பெரியநம்பி,
திருக்கோஷ்டியூர் நம்பி,
திருமாலையாண்டான்,
திருவரங்கப் பெருமாள் அரையர்,
பெரிய திருமலை நம்பி,
போன்ற சிஷ்யரைக் கொண்டு,
ஸ்ரீவைஷ்ணவ சாம்ராஜ்யத்தை
என்றுமே ஆளவந்தீரோ !

மாறனேர் நம்பியைக் கொண்டு,
சாத்தாத முதலிகளையும்
ஆள வந்தீரோ !

ஆளவந்தாரே !
இன்று உமது திருநக்ஷத்திரம் !
ஒரு வரம் தாருங்கள் !

இதுவரை காமம் எங்களை ஆள்கின்றது !
கோபம் ஆள்கின்றது !
பயம் ஆள்கின்றது !
குழப்பம் ஆள்கின்றது !
கர்மவினை ஆள்கின்றது !

இனியாவது நீங்கள் மட்டுமே
எங்களை ஆள,
பூரணமாய் அருளுங்கள் !

ஆளவந்தாரே !
எம்மையும் ஆள்வீர் !
எம் வம்சத்தையும் ஆள்வீர் !

Read more...

Thursday, August 3, 2017

ஆடிப்பெருக்கு !

ஆடிப்பெருக்கு...
காவிரி பெருக அருள் செய் ரங்கா...

ஆடிப்பெருக்கு...
யாரிடம் கெஞ்சவேண்டும்
என்கிறாய்...
மற்றவரிடமா...
உன்னிடமா...
ரங்கா...

ஆடிப்பெருக்கு...
எங்களுக்குத் தான்
பொறுப்பில்லை...
அக்கரையுமில்லை...
உனக்குண்டே...
ரங்கா...

ஆடிப்பெருக்கு...
காவிரி காய்ந்தால்
யாருக்கு அவமானம்...
எங்களுக்கா ?!?
உனக்கா ?!?
ரங்கா...

ஆடிப்பெருக்கு...
நாங்கள் வந்தோம்...
போய்விடுவோம்...
நீ தான் இங்கே நிரந்தரம்...
உனக்குத்தான் காவிரி...
ரங்கா...

ஆடிப்பெருக்கு...
எங்களைவிட
காவிரியை
அனுபவித்தவன்,
அனுபவிப்பவன்,
அனுபவிக்கப்போகிறன்...
நீயே...
ரங்கா....

ஆடிப்பெருக்கு...
ஆழ்வார்கள் சொல்..
மறந்ததோ...
திருப்பாணன் பாடல்
மறந்ததோ...
காவிரி மஹிமை...
மறந்தனையோ...
ரங்கா...

ஆடிப்பெருக்கு...
ஆளவந்தார் குளித்ததும்
பொய்யோ...
எங்கள் யதிராசன்
தவராசன் படித்துறையும் பொய்தானோ...
மௌனமேன்...
ரங்கா...

ஆடிப்பெருக்கு...
காவிரியின் அலைக்கை
வருடல் கசந்ததோ...
மணல் கை வருடல்
சுகமானதோ...
ரங்கா...

ஆடிப்பெருக்கு...
ஸ்ரீரங்கம் பூலோக
வைகுண்டமாமே...
காவிரி விரஜா
நதியாமே...
விரஜையில் மண்தான்
இருக்குமோ...
ரங்கா...

ஆடிப்பெருக்கு...
சித்திரான்னம் போதுமோ...
வயல் விளைய
வேண்டாமோ...
உன் நெல் உண்டியல்
நிரம்பவேண்டாமா...
ரங்கா....

ஆடிப்பெருக்கு...
உனக்கே அக்கறையில்லை
என்றால்,,,
என்ன செய்ய...
யாரிடம் சொல்ல...
ரங்கா...

ஆடிப்பெருக்கு...
இந்த ஆடிப்பெருக்கில்,
எங்கள் கண்ணீரே,,,
பெருகுகிறது...
இனிவரும் காலமெல்லாம்...
காவிரி பெருகட்டும்...
மனம் குளிர...
வயிறு குளிர...
மண் குளிர...
ஆழ்வார் குளிர...
பெருகட்டும்....
ரங்கா...

ஆடிப்பெருக்கு...
அடி ரங்கநாயகி...
உன் கணவனிடம்...
ஏதேதோ, வாயில்
வந்தபடியெல்லாம்...
பேசிவிட்டேன்...
நீதான் அரங்கனுக்கு
எடுத்துச் சொல்லி...
அவர் பெயரைக்
காப்பாற்றிக்கொள்...

Read more...

Friday, July 28, 2017

கருடா சௌக்கியமா !!!

கருடா சௌக்கியமா !!!

கஷ்யபரின்
தவப்புதல்வா...
கருடா சௌக்கியமா !!!

வினதையின்
கடைக்குட்டியே...
கருடா சௌக்கியமா !!!

அருணனின்
சகோதரனே !
கருடா சௌக்கியமா !!!

அமிர்த கலசத்தை
கொண்டவனே !
கருடா சௌக்கியமா !!!

வினதையின் அடிமைத்தனத்தை மாற்றினவனே !
கருடா சௌக்கியமா !!!

நாரணனுக்கும் வரம்
தந்தவனே !
கருடா சௌக்கியமா !!!

நாரணனிடம் வரம்
பெற்றவனே !
கருடா சௌக்கியமா !!!

நாரணனின் கொடியில்
ஜொலிப்பவனே !
கருடா சௌக்கியமா !!!

கண்ணனை முதுகில்
சுமப்பவனே !
கருடா சௌக்கியமா !!!

ருக்மிணிக்காக தூது
போனவனே !
கருடா சௌக்கியமா !!!

பகவானுக்காக சுமுகனை
சுமப்பவனே !
கருடா சௌக்கியமா !!!

வேதமே சிறகுகளாய்
கொண்டவனே !
கருடா சௌக்கியமா !!!

வானமாமலையில்
தவம் செய்தவனே !
கருடா சௌக்கியமா !!!

திருநறையூரின்
கல் நாயகனே !
கருடா சௌக்கியமா !!!

ஸ்ரீரங்கத்தின்
மிகப்பெரியோனே !
கருடா சௌக்கியமா !!!

நிகமாந்த மஹாதேசிகருக்கு
ஹயக்ரிவரை தந்தவனே !
கருடா சௌக்கியமா !!!

நான் உன்னை
இத்தனை முறை கேட்டேனே...
சௌக்கியமா என்று...?
நீ என்னைக் கேட்டாயா ?!?

கேள் ! சொல்கிறேன் !
கேட்காமலும் சொல்லுவேன் !

ஏதோ பூமிக்குப் பாரமாய் இருக்கிறேன் !

உன் பலமோ பெரிது !
என் மனமோ சிறிது !
உன் அலகால் என்னைத் தூக்கி,
வைகுந்தத்தில் போட்டுவிடு !

இதுவே நான் வைகுந்தம் அடைய சுலபமான வழி !

நீ என்னை
வைகுந்தத்தில் போட்டால்,
உனக்குத்தான் பெருமை !!!

ஏனென்றால் உன் பலம், சக்தி வைகுந்தமே உணரும் !!!

இன்று உன் பிறந்தநாள் !
சீக்கிரம் என்னை வைகுந்தத்தில் போடு !

கர்மாவும் செய்யாமல்,
ஞானமும் இல்லாமல்,
பக்தியும் பண்ணாமல்,
வெறுமனே இருக்கும்
இந்த ஜீவனை உடனே
வைகுந்தத்தில் சேர்த்து,
உன் பிறந்தநாளில்,
பெருமை தேடிக்கொள் !!!

கருடா சௌக்கியமா !!!
சொல்லிவிட்டேன்...
இனி உன் பாடு...

Read more...

நீயும் ஆகலாம் கலாம் !

அப்துல் கலாம்...

லட்சியத்தில்
திடமிருந்தால்,
உலகமே உன்னை
திரும்பிப் பார்க் *கலாம்*
என்று வாழ்ந்தாரே !

உண்மையாய் உழைத்தால்,
நீ ஜனாதிபதி
மாளிகையில்
தங் *கலாம்*
என்று காட்டினாரே !

தேசத்திற்காய் சிந்தித்தால்,
எல்லோர்
மனங்களிலும்
தங் *கலாம்*
என்று நிரூபித்தாரே !

செய்தித்தாள் விற்று
படித்தாலும்,
கனவை நினைவாக்க
முயன்றால்
அணு விஞ்ஞானி
ஆ *கலாம்* என்றே
சொல்லித்தந்தாரே !

உன் வேலையை
நீ ஒழுங்காக செய்தால்,
இந்த தேசமே உன்னை
வணங் *கலாம்*
என்று வாழ்கின்றாரே !

பிறந்த மதம் எதுவாயினும்,
மற்றவரை மதித்து
நடந்தால், நீ
தெய்வத்தை
அனுபவிக் *கலாம்*
என்றே புரியவைத்தாரே !

அதனால் நீயும்
ஆகலாம் *கலாம்* !

Read more...

Thursday, July 27, 2017

நீ பிறந்த திருவாடிப்பூரம் !

தூது சொல்லடி !
என்னை உன் கிளியாக்கி,
தூது சொல்லடி...
ரங்கனின் உயர் கன்னி ஆண்டாளே !

காதல் சொல்லடி !
என்னை உன் மாலையாக்கி,
காதல் சொல்லடி...
சூடிக் கொடுத்த சுடர்கொடியே !

ஆசை சொல்லடி !
என்னை உன் ஆடையாக்கி,
ஆசை சொல்லடி...
அஞ்சுக்குடிக்கொரு சந்ததியானவளே !

பாசுரம் சொல்லடி !
என்னை உன் தோழியாக்கி,
பாசுரம் சொல்லடி...
பெரியாழ்வார் பெற்றெடுத்த பெண்பிள்ளையே !

கண்ணாடி காணடி !
என்னை உன் கண் மையாயிட்டு,
கண்ணாடி காணடி...
பிஞ்சாய் பழுத்தவளே !

புலம்பல் செய்யடி !
என்னை உன் மூக்குத்தியாக்கி,
புலம்பல் செய்யடி...
பெரும்புதூர் மாமுனிக்கு பின்னானாளே !

கைத்தலம் பற்றடி !
என்னை உன்கை மருதாணியாக்கி,
கைத்தலம் பற்றடி...
திருப்பாவை பாடிய செல்வியே !

அம்மி மிதிப்பாயடி !
என்னை உன் பாத மெட்டியாக்கி,
அம்மி மிதிப்பாயடி...
ஒரு நூற்று நாற்பத்து மூன்று உரைத்தாளே !

அழைத்துச் செல்லடி !
என்னை உன் கோபாலசுந்தரியாக்கி,
அழைத்துச் செல்லடி...
ஸ்ரீவில்லிபுத்தூர் நாயகியே !

உன்னிடமே வைத்துக்கொள்ளடி !
என்னை உன் திருமுலையாக்கி,
உன்னிடமே வைத்துக்கொள்ளடி...
திருவாடிப்பூரத்து செகத்துதித்தாளே !

இவையெல்லாம் தருவாயடி !
இன்று நீ பிறந்த திருவாடிப்பூரம் !
தகுதியில்லை என்றாலும்,
உன்னிடமுள்ள உரிமையில் கேட்டுவிட்டேன் !
ஆகையால்தருவாயடி !
மன்னித்து அருள்வாயடி !

Read more...

Thursday, July 13, 2017

இனி ஒரு விதி செய்வோம் !

*இனி ஒரு விதி செய்வோம் !*
நம் மக்களை தீவிரவாதிகள் தாக்காமல் இருக்க
இன்று புதிய பிரார்த்தனை செய்வோம் !

*இனி ஒரு விதி செய்வோம் !*
தீவிரவாதிகள் எங்கும் தீவிரவாதம் செய்யாமலிருக்க
இன்று நாம் சிரத்தையாக நாம ஜபம் செய்வோம் !

*இனி ஒரு விதி செய்வோம் !*
உலகின் எந்த மூலையிலும்
தீவிரவாதிகள் தாக்காமலிருக்க
இன்று நாம் திடமாக பக்தி செய்வோம் !

*இனி ஒரு விதி செய்வோம் !*
உலகிலுள்ள தீவிரவாத
அமைப்புகள் அழிந்துபோக,
இன்று நாம் பகவானிடம் சரணாகதி செய்வோம் !

*இனி ஒரு விதி செய்வோம் !*
அனைத்து தீவிரவாதிகளின் மனமும் நல்வழி செல்ல,
இன்று நாம் ஒற்றுமையாக, பஜனை செய்வோம் !

*இனி ஒரு விதி செய்வோம் !*
வரும் தலைமுறைக்கு
தீவிரவாதம் இல்லாத உலகைத் தர,
இன்று நாம் புதிய சங்கல்பம் செய்வோம் !

*இனி ஒரு விதி செய்வோம் !*
நம் மனம் மாறினால்,
எல்லாம் மாறும் !
இன்று முதல் தீவிரவாதம் இல்லா உலகம் செய்ய மனம் கொள்வோம் !

Read more...

Monday, May 1, 2017

ஆயிரம் வந்ததோ !!!

தன்னை உணர்த்திய திருமேனியோ,
ஆழ்வார் திருநகரியிலே...

தமர் உகந்த திருமேனியோ, மேல்கோட்டையிலே...

தாம் உகந்த திருமேனியோ,
ஸ்ரீபெரும்புதூரிலே...

தானே ஆன திருமேனியோ,
ஸ்ரீரங்கத்திலே...

எல்லாம் தரும் திருமேனியோ...
எங்கள் ராமானுஜருக்கு...

எதுவும் தரும் திருமேனியோ...
எங்கள் ராமானுஜருக்கு...

நூற்றந்தாதியும் போதுமோ...
எங்கள் ராமானுஜருக்கு...

நூற்றெட்டு நாமமும் போதுமோ...
எங்கள் ராமானுஜருக்கு...

ஆயிரமும் வந்ததோ...
ஆனந்தமும் வந்ததோ...

வசந்தமும் வந்ததோ...
வைகுந்தமும் வந்ததோ...

நெஞ்சம் நிறைந்ததோ...
உள்ளம் உருகியதோ...

உடலும் சிலிர்த்ததோ...
உயிரும் தித்தித்ததோ...

கண்ணீர் வழிந்ததோ...
வாழ்வே செழித்ததோ...

எங்கள் எதிராசன்
ஆயிரத்தில்...
எங்கள் தவராசன்
ஆயிரத்தில்...
எங்கள் திருப்பாவை ஜீயர்
ஆயிரத்தில்...
எங்களுக்கும் புவியில் ஒரு மனிதப்பிறவி...

ராமானுஜா உமது
ஆயிரத்தில்
எம்மையும் வாழவைத்தீரே !

எமக்கும் ஏற்றம் தந்தீரே !

உம் கருணையே கருணை !

நன்றாயிரும் !
இன்னும் நன்றாயிரும் !

Read more...

About


Radhekrishna Sath Sangam . . .The Secured Sacred Spiritual Journey towards salvation . . .Founded by HER HOLINESS POOJYA SHREE SHREE AMMA . . .

  © Blogger templates Newspaper III by Ourblogtemplates.com 2008

Back to TOP